آغا سکندر مہدی

آغا سکندر مہدی 1926 میں رائے بریلی ، یو پی ، انڈیا میں پیدا ہوئے ۔ لکھنو یونیورسٹی سے بی اے کی ڈگری لی ۔ علی گڑھ مسلم یونیورسٹی سے بی ٹی کی سند لی اور پاکستان آ گئے ۔یہاں آ کر پنجاب یونیورسٹی سے ایم اے کیا ۔ اور محکمہِ تعلیم سے منسلک ہو گئے ۔آغا سکندر مہدی کی شاعری کی آغاز اس وقت ہوا جب وہ نویں جماعت کے طالب علم تھے۔ان کے اس دور کی نظمیں ’’آج کل ‘‘دہلی اور ’’افکار‘‘ بھوپال میں شائع ہوئیں۔

آغا ابھی بارہویں جماعت کے طالب علم تھے کہ ان کے والد سید ظفر مہدی رضوی کا اچانک انتقال ہو گیا تو انہوں نے بڑے بھائی کے کہنے پر شاعری ترک کر دی۔ اور تعلیم کی تکمیل میں منہمک ہو گئے۔تعلیم کی تکمیل کے بعد محکمہ تعلیم میں ملازمت کر لی اور بہاول پور میں سکونت اختیار کی۔دورانِ ملازمت انہوں نے خطابت کا شغل بھی جاری رکھا۔اسی دوران بھائی کے کہنے پر دوبارہ شاعری شر وع کر دی۔۱۹۶۷ء تک آغا غزلیں اور نظمیں کہتے رہے۔۱۹۶۵ء کی پاک بھارت جنگ کے موقع پر انہوں نے جوشیلی قومی نظمیں بھی کہیں۔ان کے اس دور کی شاعری بھی طبعی مناسبت اور گھر کی تربیت کے زیرِ اثر شہدائے کربلا کے ذکر سے کبھی خالی نہیں رہی۔

۔ آغا صاحب نے 1967 سے اپنی وفات 1976 تک سولہ مرثیے تصنیف کیے ۔آغا کے یہ تمام مرثیے مرثیہ معلیٰ جلد اول، دوم اور سوم کے نام سے شائع ہو چکے ہیں۔

Research. Compilation and Post by Irum Naqvi, Rawalpindi, Pakistan